之前台灣長榮海運公司超大型貨櫃輪「長賜」號喺埃及蘇伊士運河擱淺，搞到塞住條河整整六日，事件引起全球花生。受到事件啟發，有人以此整咗隻小品遊戲《WHATEVER》，玩嘅係用貨輪係運河上「漂移」，仲有怪物要打，非常抵死。

《WHATEVER》由 Napas Torteeka 獨立開發，係一款航海競速遊戲。遊戲中玩家嘅任務好簡單，就係將貨輪駛過運河，及時運送船上貨物到目的地。雖然睇落好簡單，但係實際操作就並唔容易，因為船隻體積大，河道就顯得好狹窄，加上河道蜿蜒，好多時都要靠「漂移」過彎，而且仲會有大橋、河上較小型嘅船隻等阻路，仲要收集路上嘅金幣，都幾有難度。

除咗上面所講嘅難處，越後面嘅挑戰就越多，例如河上會出現漩渦、天上出現 UFO 干擾，甚至有啲關卡會出現哥斯拉追殺你等等。現時遊戲將提供九個超困難關卡，仲會有兩隻 Boss 打，而且完全支援手制操作。

《WHATEVER》尚未有正式上市日期，Steam 商店頁面就寫住「貨輪準備好就會出發」，好過癮，有興趣嘅朋友可以先將之加入 Wishlist。