玩合作遊戲最怕就係撞到豬隊友，不過有時出事炒晒粉都幾好笑。今次我哋介紹嘅遊戲《拉拉扯扯向前衝》（Fling to the Finish）就係一款會被豬隊友直接影響嘅遊戲，因為兩位玩家之間係有條繩連住，好似玩二人三足咁，真係少啲默契都唔掂！

《拉拉扯扯向前衝》由 SplitSide Game 開發，係一款雙人合作競速遊戲。遊戲中玩家將會分成兩隊，玩法好簡單，鬥快去到終點就贏。不過講就容易，實際操作就並唔簡單，因為兩位玩家之間會有條彈力繩連住，遇到障礙物或者同另一隊撞埋一齊就好易打結。製作團隊亦都講明開頭玩果陣一定會覺得條繩好阻住，不過慢慢熟習各種技巧之後就會發現條繩好好用，可以做出大量空中動作令前進速度更快！

作為一款競速遊戲，賽道自然係重要一環。遊戲中有多種風格同主題嘅賽道，包括飄浮公園、巨大賭場、小行星帶等等，加上路上會不停出現從天而降廁所泵、沉重嘅砝碼、危險嘅雷射等等，時刻暗算玩家，就算帶頭都有機會輸返。另外本作支援網上連機同單機多人遊玩，仲有二人共用一個手制嘅高難度模式。

《拉拉扯扯向前衝》（Fling to the Finish）已於 8 月 24 日發售，對應平台為 PC Steam，支援繁體中文。