「時間迴圈」呢個概念充滿未知元素，多個作品如《All You Need Is Kill》、《明日邊界》定係《Re:從零開始的異世界生活》都有呢個元素並廣受歡迎，遊戲都有「魂係」、「Rougelike」等類似嘅概念，不過打正旗號真真正正玩時間迴圈嘅就非常少見。今次介紹嘅《Twelve Minutes》（12 分鐘）玩「時間迴圈」，概念正到連小島神都話期待！

《Twelve Minutes》由獨立遊戲開發者 Luis Antonio 製作，係一款互動式恐怖懸疑遊戲，採用俯瞰視角。遊戲講述由玩家所扮演嘅主角，同太太兩個人喺屋企食飯時，突然有一隻警察衝入屋話你太太謀殺自己父親，你挺身反抗時慘被殺死，當你再次打開雙眼時，發現時間回到事發前嘅十二分鐘，並被困呢個時間迴圈，不斷重覆經曆相同恐懼，唯一解決之道，就係利用對後續發展嘅瞭解，改變結果，打破迴圈。

遊戲玩法係透過滑鼠點擊與場景互動進行，為下一次嘅「爆門」做準備，並且喺每一次嘅失敗中嘗試中解鎖更多嘅選項，慢慢了解事情嘅影響，改變結果，打破迴圈（好有《Re:0》死亡回歸感覺）。另外本作嘅配音都好勁，有 James McAvoy（後生版 X-教授）、Daisy Ridley（《STAR WARS：原力覺醒》中女主角芮）同埋 Willem Dafoe（《蜘蛛俠》綠魔），而知名遊戲製作人小島秀夫喺在 Twitter 都有 Share 呢隻遊戲，仲話已經期待咗好耐了。

これ、この間からものすごく気になっているゲーム！！！ //t.co/KDgZadDu2p

— 小島秀夫 (@Kojima_Hideo) August 17, 2021

《Twelve Minutes》將於香港時間 8 月 20 日正式上市，對應平台為 Xbox Series X|S、 Xbox One 及 PC Steam，對應繁體中文，並會同步加入 Xbox Game Pass。