今屆東京奧運新增滑板項目，賽場上各選手表現精彩，場下大家表現融洽，大家睇得愉快，亦令大眾提高對滑板呢項運動嘅關注。早前就出咗款非常純粹嘅獨立小品滑板遊戲《The Ramp》，無任何花巧只係集中點「玩」滑板，好適合有興趣接觸滑板嘅朋友。

《The Ramp》由 Hyperparadise 獨立開發，係一款單機滑板遊戲。遊戲中無故事無野要解鎖無任務無分數，有嘅只係最純粹嘅滑板操作。玩家可以喺 U 型場地、泳池、高台同滑板場四個場地中，用滑板做出各種花式。遊戲支援手制操作，玩法亦都簡單，注意加速起跳同平衡就得，整體都係偏向輕鬆休閒，但仍然有高難度動作，完全取決於玩家幾想挑戰自己。

《The Ramp》已經推出，對應平台為 PC Steam，售價為 HKD $35，相當便宜。老實講，呢個價錢無聊時開黎 Hea 下都抵，而且遊戲速度感、物理都算做得唔錯，值得支持。