喺七月尾時由 NEXON 與旗下 NAT Games 合作開發嘅全新打寶射擊遊戲《Project Magnum》正式發表，日前終於有首條宣傳片，除咗畫面好靚之外，仲展示咗唔少戰鬥片段，當中透露出部份遊戲系統細節，睇落幾唔錯。

《Project Magnum》係一款科幻風格射擊打寶遊戲（好有 FF 味），加入合角色扮演元素，使用第三身視點，主打 PvE。喺展示影片中見到遊戲可以四人合作，使用機關槍、大砲等槍械或者大錘等近戰武器殺敵。技能方面有風、冰魔法，亦有近戰特化攻擊，甚至有將敵人吸埋一舊嘅特殊手榴彈武裝。

每名角色會有類似《隻狼》鉤繩嘅快速移動手段，不過喺片中淨係用於建築物上移動，未知可否用於敵人身上。另外片中亦有出現 Boss 戰鬥，根據之前新聞稿得知遊戲中會有巨大 Boss 戰，令人極為期待。

《Project Magnum》現時處於開發階段，未有確實推出日期，對應平台為家用主機、PC。根據之前新聞稿所指，遊戲會喺中國以外全球地區推出。