工作室 OnceLost Games 公佈旗下全新開放世界史詩式大型 RPG《The Wayward Realms》，並公開首條官方片段；遊戲以 Unreal Engine 5 開發，發售日未定，目前以對應 PC 平台為主，日後會再公佈其他對應主機平台。

OnceLost Games 由曾參與開發《上古捲軸（The Elder Scrolls）》系列包括《Arena》《Daggerfall》及《Battlespire》等作品嘅 Julian LeFay 及 Ted Peterson 開設，當中 Julian LeFay 更有「上古捲軸之父」之稱。工作室於 2019 年時表示佢地正籌備一隻大型 RPG 作品，而事隔兩年之後終於有正式資訊公開。

工作室形容《The Wayward Realms》無論係遊戲內容以及世界觀都極為宏大，唔止係一隻 RPG 咁簡單，佢地會形容新作品為「The Grand RPG」。

遊戲採用開放世界設定，以架空世界「Archipelago」作為舞台，上面居住各樣種族，包括人類、矮人、精靈，仲有一啲具有原創性嘅種族希望為玩家帶來新鮮感；工作室又表示，遊戲世界龐大，將會有數以萬計嘅 NPC、支線、各種建設與城鎮。

工作室表示，遊戲大約仲需要幾年時間去開發，但係相信製成品能夠成為 RPG 愛好者嘅一個新經典。遊戲現已設置 Steam 頁面。有興趣嘅玩家可以先行將遊戲放入願望名單。目前遊戲推出日未定，有新消息會再為大家報導。