中世紀角色扮演遊戲大家應該玩唔少，當中有「盜賊」職業嘅遊戲亦不乏少數，但通常都只係敏捷較高，用刀仔有潛行背刺技能，好少話真係叫你主力玩偷野。早前公開嘅遊戲《Bandit Simulator》玩家同樣係扮演賊仔，但係遊戲主軸變成主力玩偷野打劫，喺中世紀開放世界橫行又幾過癮。

《Bandit Simulator》由獨立團隊 Titanite Games 製作，係一款動作角色扮演遊戲，採用第一身視點，開放世界。遊戲目標非常簡單明確，就係由藉藉無名嘅賊仔逐步向上爬，以成為盜賊大師為最終目標。起手第一步自然係要搵錢，至於用偷偷摸摸嘅方式打荷包，定係正面挑機打劫，全部由玩家決定。

要進行劫案，自然就要部署計劃，例如喺森林大路中預先整定陷阱再借機搶奪財物，又或者喺酒館中偷走醉酒人士財物（入屋爆格都得，開鎖方式都幾「流」），無論係用咩方法都要小心，因為一旦事敗就會進入戰鬥，萬一打輸的話就會被關入監獄，雖然都有脫獄手法，但係並唔係次次都咁容易的。

除咗打劫偷野，玩家亦可以與居民互動，接取各種任務取得資金，之後就可以買更好嘅裝備，仲可以升級個人技能，做案時自然更加得心應手。

《Bandit Simulator》暫時未有正式發售時間，對應平台為 PC Steam。現時已有提供體驗版免費下載，支援繁體中文。