好多線上多人合作遊戲都會有「挖礦」呢個元素，通常都係搵舊石鑿下就係，日前發表嘅新作《The Sabotage》，不但將挖礦變成主題，更加入猶如《Among Us》般喺朋友背後捅一刀嘅「狼人殺」玩法，非常過癮！

《The Sabotage》由 Yeyuna 團隊開發，係一款多人線上合作遊戲，採用第一身視點，支援四人連機遊玩。遊戲中玩家將扮演挖掘者，其中一人扮演破壞者，喺隨機生成嘅地圖入面達成各自嘅目標，每場時間為十分鐘。扮演挖掘者一方勝利條件係挖到金礦，身為破壞者勝利條件自然係誤導其他人遠離金礦，或者扮挖礦伺機搞事。

喺礦坑入面必備嘅頭燈、十字鎬、炸藥都係消耗性資源，當電池、炸藥等物品用晒就要返去地圖特定地點補給，呢個時候亦係破壞者偷偷行事嘅機會。可以用炸藥破壞隧道，亦可以用斧頭慢慢劈，而被破壞係無法修復的，所以喺設計挖掘路線時要考慮清楚，當然使用語音聊天 Chok 下邊個搞事都係一個有效嘅方法。

《The Sabotage》處於開發階段，未有實際推出時間，對應平台為 PC Steam，有興趣嘅朋友可先加入 Wishlist。