呢排真係節奏音樂 Game發圍，啱啱先有消息話 DJMax 會出隻 PS4版本，另一邊 LoveLive! 街機又就出啦，跟住又到係 iNiS 既副社長矢野慶一係最近一個採訪上面話有意繼續做《押忍！闘え！応援団》既續作，聽到呢個消息我真係好鬼開心！

訪問入面，矢野慶一就表示：

當然，我地同任天堂擁有有良好既關係，而呢種類型既遊戲大多數都會有後續作品，所以就算再出續作係好正常既事，而且都係會有一個時間點就係大家都會感覺到：係時候啦。而係大多數情況下，都係硬件平台去決定呢個時機既。例如，當每個人都覺得：呢款遊戲如果出係呢個平台既話就無敵啦！咁就你就知道呢個係遊戲出續作既最佳時機。(咁我又真係覺得《押忍！闘え！応援団》出係 DS上面係正確到裂既決定黎)

成個訪問除了上面呢段說話之外，矢野慶一亦都講到明佢地係有意願開發續作。如果一切順利既話，就可能會係老任既下個平台上面出續作，如果下個平台係 NX既話…….可唔可以出係 New 3DS阿唔該。

《押忍！戰鬥！應援團》(日語：押忍！闘え！応援団)，係由iNiS製作，任天堂發行係任天堂DS平台上既音樂遊戲軟體。「應援團」日語就係啦啦隊既意思，玩家係遊戲入面扮演「應援團」成員，為咗幫佢地解決困難實現願望，所以就幫助各種各樣人加油助威 (好記得有首歌係個老豆失業要幫佢加油)。遊戲故事風格非常簡單但係好鬼死熱血，樂曲充滿強勁節奏，配搭攪笑既漫畫風格，而且好充分咁利用到任天堂DS既觸控螢幕黎玩，係 DS 時代不得不玩既作品之一。而續編《燃燒！熱血韻律魂 押忍！戰鬥！應援團2》係2007年5月17日發行，之後就再無系列既消息啦。由於《押忍！戰鬥！應援團》既出現，為音樂遊戲帶黎咗變化，係2008年 Microsoft就出咗隻《Lips》，到2011年 UbiSoft就出咗隻《The Black Eyed Peas Experience》，至於 PC 既 OSU！就更加大行其道啦，所以今次既消息對我呢啲 Fans黎講真係好興奮！