《巴蘭的異想奇境》製作人中裕司正式離職 Square Enix，由佢成立嘅 Balan Company 工作室亦同時解散。

中裕司為《超音鼠》系列製作人，於遊戲業界有「超音鼠之父」嘅稱號，亦曾擔任 2000 年《Phantasy Star Online》製作人。中裕司於 2000 年離職 SEGA 之後，曾經開創過自己嘅工作室 PROPE，不過就未有再創《超音鼠》一樣嘅神話，呢段時期開發嘅遊戲作品未算有太大知名度。及至 2018 年，中裕司轉投 Square Enix，並成立專屬工作團隊 Balan Company，希望可以用《巴蘭》系列再戰自己事業高峰。

《巴蘭的異想奇境》於 2021 年 3 月 26 日推出，為一隻可二人同時遊玩嘅歷險作品。不過，儘管打住「超音鼠系列精神續作」嘅旗號，亦有加入換裝、收集等等元素，但係《巴蘭的異想奇境》於業界嘅評價、以及玩家之間嘅回應都不獲好評。

編輯部曾經試玩作品，遊戲難度太低，劇本薄弱，畫面用色及畫質有種微妙嘅年代感，使用二人操作時更會因為角色距離而互相拉扯視點，遊玩體驗絕對稱唔上有趣。

除左遊戲本身嘅問題，《巴蘭的異想奇境》推出當日，亦都係《Monster Hunter Rise》嘅上架日，在雙重打擊下，《巴蘭》嘅銷售量以及評價都可以用「大爆死」去形容。製作人中裕司於四月份離開 Square Enix，相信與《巴蘭》嘅成績有莫大關係。

中裕司目前未有更新最新任職狀況，不過唔係任何遊戲都可以改頭換面就能夠再創神話，在此都祝福製作人可以早日搵到新嘅方向。

《巴蘭的異想奇境》於 2021 年 3 月 26 日推出，對應 Xbox One｜Series X｜S、PS4｜5、Switch 及 PC Steam。