蘇聯 + 末日廢土呢個組合好似成日都出現，日前又有一款新嘅遊戲《Pioner》同樣採用呢個組合。喺呢款遊戲入面玩家們將會係末日蘇聯廢土上努力生存，對抗地上嘅人 & 怪物並建立家園，睇第一條 Trailer 感覺就唔錯，值得留意。

《Pioner》由俄羅斯團隊 GFA Games 開發，係一款大型多人線上動作射擊遊戲，採用第一身視點，開放世界。遊戲中蘇聯因為發生技術性災難，島上因為充斥住神秘嘅異常能源而需要隔離，由玩家所扮演嘅退役特工喺呢場災難中倖存，並以尋找營救隊友以及探索神秘異常災難源頭為目標前進。

《Pioner》同其他線上遊戲最大嘅分別係佢嘅升級系統。喺呢隻遊戲入面採用「影響力水平」（Influence Level）反映角色進度，呢個等級並唔會影響玩家數值，亦唔會提高角色戰鬥能力，而係令玩家可以接更多任務、更多補給、更多改造權限，同時可接觸更多有價值物品以及新武器供應商。玩家可透過完成任務、走私或交易提高勢力等級。

遊戲中有動態氣候系統，地圖上會隨時出現暴雨、風暴等惡劣天氣，亦會日夜替換，喺晚間更會有極危險嘅突變怪物「LESHIY」出沒。面對險峻環境，自然要有強力武器，透過工作台可以創造或拆除武器附件並製作新嘅武器，自訂嘅武器系統會大幅改變性能，並且適用於任何戰鬥風格，非常有靈活性。

喺隔離世界內因為要生存，自然衍生出因應不同生存目的而誕生嘅四大派系勢力，玩家可加入各派系完成相關任務，而你所作出嘅決定同路線會影響故事結局與任務目標。遊戲雖然主打 PvE 合作生存，但係都有 PvP 系統，玩家喺部份危險特殊地區中可以搵到大量寶貴資源以及機密文件，呢啲地方有強大嘅生物等緊你，同時仲要對抗其他黎搶資源嘅倖存者，似乎幾唔錯。

《Pioner》目前仍處於開發階段，對應平台為 PC，更多消息請留意官方網站。