遊戲發行商 NEOWIZ 公佈全新主機遊戲《Lies Of P》。《Lies Of P》為一隻「類魂系」高難度動作遊戲，由 NEOWIZ 旗下工作室 Round8 Studio 針對次世代主機平台而開發，預計將對應 Xbox Series X｜S、PS5 及 Steam，正式發售日未定。

《Lies Of P》劇本取材至意大利作家「卡洛·科洛迪」著名童話《木偶奇遇記》，故事時間點為 19 世界末被稱為「Belle Époque」嘅「美好時代」，舞台為法國。原本繁華而美麗嘅城市，因為出現疫病，一夕之間變成人間煉獄。

主角木偶「匹諾曹」於遊戲中化名為 P。製作出「P」嘅木偶師「爺爺」將 P 帶到車站後就失去蹤影，而覺醒嘅 P 則帶著「對抗疫病」嘅使命，以及「想要成為人類」嘅念頭，開始踏上旅途，並希望可以搵返「爺爺」。

遊戲可以話係暗黑版本嘅《木偶奇遇記》，P 係一個真人大小配有金屬手臂嘅高戰鬥力木偶，而奇怪疫症漫延嘅法國，無論係瀰漫住巴洛克風格嘅建築及街道、以及遊戲整體氛圍都帶有一點《Bloodborne》嘅味道。

不過，與《Bloodborne》唔同嘅係，《Lies Of P》並沒有克蘇魯元素，取以代之嘅係機械形態嘅各類敵人。同時，P 與戰鬥｜冒險中亦會獲得唔同嘅配件及武器，去強化自身嘅機械手以及攻擊力。遊戲目前公開嘅片花當中暫時未見到正式戰鬥畫面，所以雖然遊戲目前定位為「類魂系」，不過戰鬥難度目前都仲係耐人尋味嘅一環。

玩家於《Lies Of P》裡面亦會遇上唔少殘存嘅人類，當中會產生唔同嘅支線以及選擇，可能需要玩家 P 選擇「講真話」定係「講大話」；唔同嘅選擇都會導向唔同嘅事件結果，亦會影響最終遊戲結局走向。

遊戲目前正式發售日未定，工作室目標係能夠做到全球同步推出，有最新消息會再為大家報導。