一般香港人對瑞士嘅認知都係黎自瑞士糖同瑞士雞翼，不過其實真正嘅瑞士係有「世界花園」之稱，有大量高山，當然亦有深山小鎮。今次介紹嘅遊戲《MUNDAUN》就發生喺瑞士東南部高山地帶一個真實存在嘅同名小鎮，配以獨特嘅鉛筆手繪方式，營造出別樹一格嘅詭異味道。

《MUNDAUN》由 Hidden Fields 製作，係一款驚慄解謎冒險遊戲，採用第一身視點。遊戲故事講述主角喺某日收到消息，自己住喺「Mundaun」嘅祖父因為一場大火而死亡，於是主角動身前往自從童年之後就未去過嘅地方。到埗之後，發現祖父嘅死亡原因並不單純，身邊亦都出現不可思議嘅現象，而當地嘅居民亦都似乎有不可告人嘅秘密。為咗解開祖父死亡嘅真相，主角決定喺呢個高山地區進行探索並解開背後嘅謎。

由於遊戲舞台係真實存在，創作團隊亦曾經實地考察，再用鉛筆手繪風格將周邊地形、建築物等變成遊戲圖像，加上遊戲本質係驚慄解謎，呢種粗糙感反而更添恐怖氣氛，不過對追求畫面優美嘅朋友黎講就會係缺點。

遊戲本身有唔少謎題要解，亦會有額外支線任務，系統會有明確指示，亦會有戰鬥、駕駛車輛等玩法，不過操作就唔複雜，動作遊戲苦手都無問題。另外本作有一個特別嘅「恐懼抵抗因素」系統，會就「因果關係」產生變化，例如當玩家恐懼越強烈，移動速度就越慢，更添恐懼感。

故事劇情方面，本作有多重結局，玩家喺部份選項中嘅抉擇會影響到最終結局，想睇晒全部劇情的話就要玩多幾次了，而每次通關時間大約要五至六小時，時間適中。

《MUNDAUN》已經推出，對應平台為 PS5、PS4、Xbox One、Xbox Series X|S、Nintendo Switch 及 PC Steam、Epic Games Store，只有英文版（PC 中文版請自行尋找）。