Line Game 之前喺「LPG 2021」時公佈咗一款叫《The Vanshee》嘅線上動作遊戲，展現出極華麗畫面兼紮實嘅打擊感，而且重唔係手機遊戲，令人大為期待！遊戲預計今年會進行搶先體驗，絕對值得留意！

《The Vanshee》由韓國工作室 Pixel Cruise 以 Unreal Engine 4 引擎製作，係一款線上動作角色扮演遊戲，採用第三身視點。遊戲背景講述人類世界被外星人入侵正逐步步向毀滅，由玩家所扮演嘅「Vanshee」就有特殊能力可以使用外星科技及魔法，並保護人類免受滅絕。

遊戲現時所公開嘅資訊唔多，喺展示影片中見到遊戲畫面非常華麗，特效、光影亦做得非常出色，而且動作遊戲最重要嘅打擊感紮實，加上流暢兼自成一格嘅動作的確令人眼前一亮，絕非啲望兩眼就一大陣「DMC 味」嘅換皮 Game 可比。

另外根據相關資料，同一般線上遊戲不同，本作並無職業限制，玩家可自由養成角色，配以各種武器以及技能，組合出一隻符合自己玩法嘅角色，就咁睇齋養成都幾多野玩，但考慮到係線上遊戲，即係肝到爆……。

《The Vanshee》預計於 2021 年以搶先體驗形式發佈，對應平台為 PC Steam。