講到二戰主題射擊遊戲，通常大家都會諗起《戰地風雲》、《榮譽勳章》、《War Thunder》等等，最近就有一款免費嘅二戰射擊遊戲新作《Enlisted》推出，最特別嘅玩法就係玩家不再單兵上陣，每人都會控制一整個小隊，令戰況更具變化。

《Enlisted》由 Gaijin Entertainment 及 Darkflow Software 開發（前者即係做《War Thunder》果間），係一款多人線上射擊遊戲，採用第一身視點，基本免費。遊戲以二戰為主題，玩家開始時可選擇盟軍或軸心國，然後就要選擇兵團。開始時玩家只有步兵團、狙擊團以及裝甲兵團選擇，「戰役等級」提升後就會解鎖更多兵團。

喺呢隻遊戲入面，玩家係以小隊隊長身份出擊，而你所帶領嘅小隊人數會因應兵種及單位改變，介乎於 5 – 9 人。戰鬥中玩家可任意時間切換小隊操作成員，非玩家操作嘅角色將由 AI 負責，而操作中成員即使被擊敗，只要隊中尚有其他成員存活，仍可切換至該隊員繼續戰鬥。有趣嘅係初始時隊長所擁有嘅武器質素會比一般隊員好，不過後期有得為兵團每個士兵自訂武器同技能，只要肝得夠或者課得夠多，你兵團中嘅每位士兵都會擁有精良嘅武器。

玩得二戰遊戲載具自然係必備環節，遊戲中有坦克可以操控，威力仲有返咁上下，不過就唔似《戰地風雲》咁有得見樓拆樓，呢點略遜一籌，玩家同樣可隨意於砲手或駕駛間切換。隨軍團解鎖仲會有更多載具使用，例如空軍軍團。

除咗自訂士兵，由士兵組成嘅兵團同樣有極多野玩。「強化兵團」最基本嘅功能當然係增加兵團士兵數，然後就係解鎖更多類型嘅兵團（例如爆破兵團），而解鎖嘅條件就係提升戰役嘅等級，暫時每個戰役有 25 LV……睇到呢度應該要搵野護肝啦。

之前公測就開放咗「莫斯科之戰」、「登陸諾曼第」兩個戰役，之後就會追加「突尼斯之戰」同「柏林之戰」。戰鬥模式暫時有「佔領戰」－佔領據點後可減低敵軍士氣值，一方歸零時即告戰敗；「入侵戰」－攻守雙方各有 1000 兵力值，每個單位死亡 -1，兵力值歸零前無法攻下五個據點的話為守方勝，反之攻方勝。

《Enlisted》現時已於 Xbox Series X|S 及 PS5 （美、日 PS Store）推出，PC 版就要裝 Gaijin 啟動器，暫時未有亞洲服。