曾製作知名喪屍生存遊戲《DayZ》嘅 Dean Hall 成立咗一間新嘅工作室 RocketWerkz，佢哋黎緊將會有一隻新作《ICARUS》，同樣哋係生存遊戲，不過就更強調合作。早前官方出咗一條真人預告影片，亦都喺直播入面公開實機遊玩示範，整體感覺唔錯。

《ICARUS》係一款多人合作生存動作遊戲，採用第一身視點（分類有寫第三身視點，應該係可以自由切換），開放世界，最大支援八人同遊。遊戲講述人類尋找新嘅星球作為居所，星球「Icarus」被發現氣候、生態都極似地球，被視為最佳嘅遷移居所。可惜地型突然出現變化，空氣亦都開始釋放有毒物質，令人類移居嘅計劃破滅。與此同時，科學家們發現星球上嘅礦物有極高嘅價值，引發各國間爭相搶奪，並派人去「Icarus」挖掘更多嘅礦，如果有命返黎的話……。

因為「Icarus」空氣滿佈有毒物質，所以喺星球上嘅活動時間係有限的，而且運輸機亦唔會等人，所以玩家要喺時限內完成任務並返去運輸機上。玩家喺地上探索時可以砍伐每一棵樹、開採任意一舊石，當然玩家要想辦法利用地上有限嘅資源製作工具、機械等等，同時要確保食物、氧氣等生存要素，亦要製作武器抵抗星球上嘅野外生物。

《ICARUS》官方尚未有正式推出時間，但係就即將於 PC Steam 展開搶先體驗，有興趣嘅玩家可以放入 Wishlist 先。