根據 Bloomberg 報導，Amazon 已經決定正式取消《魔戒 The Lord of the Rings》MMORPG 企劃。

Amazon Game Studios 於 2019 年時宣佈，與 Leyou（樂遊）旗下 Athlon Games 合作開發一隻以《魔戒》小說為依據嘅 Online MMO RPG，當時預計對應平台為 PC、PS4 以及 XBox。

樂遊科技於 2020 年末正式被收編騰訊旗下，因此《魔戒》MMORPG 企劃亦變成 Amazon 與騰訊兩方嘅合作，不過消息指出，騰訊對於 Amazon 與樂遊科技一開始傾好嘅條款感到不滿意，而新提出嘅條款未能滿足 Amazon 方面嘅要求，所以決定取消《魔戒》MMORPG 嘅遊戲開發。

不過，Amazon Game Studios 近年於遊戲開發方面發展並唔順利。工作室開始成立時聲勢浩大，但於 2020 年時宣佈重組，解雇大量員工；近期先係取消原定免費遊玩嘅射擊遊戲《Crucible》，另一隻線上 MMO 遊戲《New World》亦都多次延期推出，加上今次佢地再次決定取消遊戲《魔戒》，似乎都令人頗為擔心工作室未來嘅發展。

《魔戒》係世上最具標誌性嘅 IP 之一，唔少玩家都極為期待可以玩到根據原著小說改篇嘅 MMORPG，今次取消開發真係非常可惜；不過 2019 年公佈至今，一直圖又無片又無，其實對於 Fans 黎講都未敢抱有好大期望。

或者大家可以改為留意另一隻由德國遊戲開發商 Daedalic Entertainment  製作嘅《魔戒》題材遊戲《The Lord of the Rings: Gollum》（相關報導），呢隻遊戲預計近年內會推出。