通常城市管理遊戲例如《SimCity》、《Tropico》等，主要都係點整好交通、城市規劃之類，但係如果成個城市啲建築物都有生命，識自己郁又點睇？《Buildings Have Feelings Too!》入面嘅建築物全部都有生命，有自己想法仲會識朋友，用嶄新嘅角度去演繹城市管理遊戲。

《Buildings Have Feelings Too!》由獨立團隊 BlackstaffGames 製作，係一款城市管理遊戲。遊戲講述城市迎來變遷，引入大量新嘅建築物，而舊有嘅建築物「造船廠」就率先面臨被拆除命運，緊隨其後嘅仲有亞麻磨坊、倉庫、老銀行等等，大家都人人自危。呢個時候由玩家扮演嘅建築物「中途旅館」伸出援手，諗辦法團結大家並希望喺不斷變遷嘅世界中存活。

遊戲有正常嘅城市規劃元素，玩家可以挖掘及建設由維多利亞時代到現代社會嘅各種建築及企業，當中包括各種商店、辦公室、娛樂設施及公共設備（仲要逐級解鎖）。玩家喺改造城市嘅過程中，可以同其他建築物成為朋友，佢哋亦會自己周圍周以及彼此進行對話，從中可以了解到佢哋自身嘅抱負、希望同恐懼。玩家透過城市拓展，令到建築物們變得更有朝氣及活力，就有機會免除被拆嘅命運，而且透過拓展社區仲會探索到新嘅角色及地區，並以城市建設為大都會為目標。

《Buildings Have Feelings Too!》預計 4 月 22 日推出，對應平台為 PS4、Xbox One、Nintendo Switch 及 PC Steam。