紅白機年代出現一隻又一隻嘅經典作品，喺呢堆經典作品中，可以稱得上係神作嘅一定有《月風魔傳》。呢隻喺 1987 年推出嘅作品，有當時極之創新甚至係影響之後遊戲發展嘅眾多元素，受到超大量玩家所喜愛。呢款神作相隔三十幾年終於推出新作《月風魔傳：不朽之月》（GetsuFumaDen: Undying Moon），消息一出令人振奮。

《月風魔傳：不朽之月》由 Konami Digital Entertainment 開發，係一款 Roguelite 橫向動作角色扮演遊戲。今集故事講述前作「月風魔」擊敗龍骨鬼後，經過千年和平日子後，地獄封印被解開，魑魅魍魎重現人世。繼承「月風魔」之名嘅二十七代當家肩負保護人界嘅職責，於是就隻身深入地獄斬妖除魔。

今集遊戲採用浮世繪美術風格，同樣係橫向動作遊戲但就加入 Roguelite 元素。喺影片中見到左下方見到有主武器、第二裝備及遠程武器，但係就唔見作品招牌「銳利度」（舊作用同一武器越耐就會越利，攻擊力會提高）。暫時已知主武器有劍、拳、槍、狼牙棒、扇等多種武器，經典武器會射出「力」字嘅鼓就未見身影（應該點都會有波動劍，但個人更想有陀螺＋飛鏢），亦未知跌死後出現大大隻嘅「死」字會否重現。

由於今集係玩快速 Roguelite 系統，舊有喺大地圖收集情報、刷錢買劈石刀前往新區、拎鎖匙行 3D 迷宮等經典玩法可能會取消或以新方式呈現，但係對舊玩家黎講味道就一定同以前有大分別。慶幸熟悉嘅龍骨鬼會再現，加上五首龍、風神雷神等其他大型頭目，仍然值得玩。

《月風魔傳：不朽之月》預計於 5 月 14 日於 PC Steam 進行搶先體驗，參與嘅玩家將會得到數位畫冊「月風魔傳設定畫集」、數位迷你原聲帶「Digital Mini Soundtrack」以及任天堂紅白機版《月風魔傳》（Steam 版）特典贈品。另外之後仲會有免費 DLC 追加第二位主角二十一代當家「月蓮華」，喺前往地獄探索後失蹤。除咗 PC Steam 之外，仲會有 Nintendo Switch 版本，不過就要等到 2022 年推出，未知有無特典。