KOEI 旗下工作室 GUST 於 2017 年推出嘅唯美風格少女 RPG 遊戲《BLUE REFLECTION 幻に舞う少女の剣》宣佈推出續集。KOEI 於 3 月 28 日同步發表《BLUE REFLECTION TIE/帝》以及《BLUE REFLECTION SUN/燦》兩隻遊戲，前者對應平台為 Switch、PS4 及 PC Steam；後者則為手機遊戲，對應 iOS、Android、DMM。

《BLUE REFLECTION 幻に舞う少女の剣》於 2017 年 9 月 29 日正式推出中文版，以同一世界觀改篇嘅動畫版本《BLUE REFLECTION RAY/澪》亦計劃於 2021 年 4 月開始播放。KOEI 似乎有意將遊戲發展為大型系列作品，今次宣佈嘅新作會以第一集作為舞台原點，並加入新角色去開展新的旅程。是次遊戲人設美術繼續由岸田メル老師擔當。

以下為動畫版 PV：

《BLUE REFLECTION 幻に舞う少女の剣》裡面，女主角白井日菜子本身係芭蕾舞選手，喺參加國際大賽時雙腳受傷，因此以後都無辦法成為職業選手；失去芭蕾舞就如同失去咗人生目標，日菜子喺一片哀愁中開始佢嘅高中生活。

開學當天，日菜子被扯進了異空間，得到力量變身成為魔法少女 Reflector；返到現實之後，日菜子發現 Reflector 唔止佢一個，仲有班上面兩個同學：夕月及來夢。因為堅信成為魔法少女，自己對腳就可以醫返好，所以女主角嘅戰鬥生活從此展開（編輯部評測按此）

《BLUE REFLECTION 幻に舞う少女の剣》

遊戲當年嘅系統與戰鬥都尚有進步空間，不過由《奇諾之旅》作者時雨沢惠一老師撰寫嘅劇本非常細膩，少女們之間嘅互動與心理掙扎，亦都令到作品成為唔少玩家心中嘅難忘之作。

目前兩隻新作品未有正式發售日期，有最新消息會再為大家報導。