【遊戲攻略】新手獵人小知識技巧《Monster Hunter Rise》教你地圖長期顯示道具等設定

《Monster Hunter Rise》上星期就出咗，好多本身由《Monster Hunter World》入坑嘅朋友都轉場，加上因應熱潮加入屠龍大軍嘅人亦不乏少數，所以特別整返篇小知識+實用小技巧，幫助未適應新系統嘅朋友快速上手。

任務系統回歸舊版設定

由《Monster Hunter World》開始加入嘅朋友相信對呢個設定非常陌生，喺《MHR》入面任務系統回歸到舊版設定，即係將村任（單機主線）同集會所任務係分開的（不過就算齋做村任去到咁上下都會提升 HR），亦即係話如果單人技術不足的話有機會「卡關」。雖然係咁，但玩家依然可以透過集會所收集素材，製作更強嘅裝備先返去打村任，用「裝備制壓」方式碾過去，而且村任魔物血量非常少，難度不算太高。

視距、鎖定、特效設定

戰鬥時有無覺得畫面太接近角色，令到視野受限？其實係有得自己 Set的。方法係按「+」鍵進入選項，再喺「視角」>「視覺距離」中調到 100，就會將鏡頭拉後令視角變得更廣。另外與大型魔物戰鬥時，「鎖定」呢個動作都有得微調，同樣喺「視角」>「注視目標方式」將預設嘅「目標視角」轉成「鎖定視角」就會長期鎖定魔物，不過對上會快速移動嘅魔物時視角會變得極快，需要注意。「目標視角操作」就可以微調按 L 鍵對正視角的設定，預設係按 L 1次視角將面向被鎖定魔物，按 2 次面向玩家正面。

另外今集攻擊特效雖然華麗，但係多人連線時特效過多真係睇到人頭暈。喺「遊戲設定」>「命中特效表現」，將效果由「普通」轉為「較少」可稍微改善呢個問題。

小地圖顯示採集、生物等標示設定

好多人遇到嘅問題，就係小地圖真係好「小」，而且仲乜都唔顯示，下下要撳返入去詳細地圖睇好麻煩，不過同樣有辦法解決的。先按「+」鍵進入選項，「遊戲設定」>「HUD 的地圖顯示類型」，將「整體地圖」轉成「放大地圖」。然後出任務時長按「-」進入詳細地圖，再按 L / R 選擇要顯示嘅圖標如採集、強化生物等，就會喺小地圖出現相關圖標，不過就無法顯示小型魔物。

農場變更為潛水艇應盡快解鎖

收集道具必備嘅「農場」黎到《MHR》變為潛水艇，位於隨從廣場，用途係派出隨從幫你收集指定道具。只要解村任好快就會有第一隻潛水艇，只後村任去到三星就會開放新支線任務「以特產品進行異文化交流」，村六星會開放「以特產品來活絡交易」，完成後就可以解鎖第二及第三艘潛艇，我哋會有另外文章教學。

隨從要訓練培養時要注意技能

今集隨從分為貓狗兩類，佢地有自身「隨從技能」，艾路貓就有「支援類型」，玩家雇用時需考慮自身需求，例如想隨從主力幫手打嘅就可以選擇幫助加會心、加攻類型，又或者會作出支援行動如補血、陷阱類型，想主力幫手採集的就要揀返相應嘅隨從。另外隨從等級提升後不但會學到新技能，仲會影響參加「隨從隱密隊」獲得嘅物資品質及數量。所以最好嘅做法係起碼有六隻道場特訓 + 四隻「隨從隱密隊」= 十隻隨從，每次訓練完輪流交替。

操作狗狗小技巧

今集可騎乘狗狗作快速移動，按緊 R 時按進行衝刺，於衝刺時按 ZL 即可進行甩尾，甩尾完結後會得到短暫性加速能力，趕路一流。另外騎乘時按 ZR 可進行跳躍，衝刺時按 B 就會以跳起並脫離坐騎，可用作快速進場突擊魔物之用。另外配合騎乘跳躍，可以用騎乘跳躍 > 空中脫離 > 翔蟲 x2 作出三段跳，可以去到更高嘅位置。

交換技能令戰鬥更添變化

當村任去到三星又或 HR 2 後，教官會同你講試用「交換技」，之後再去返道具箱就可以轉技。呢個系統簡單講就係將原本嘅招式替換成另一招新技，例如充能斧高壓屬性斬就會變成高壓回填斬，即係拎就紅劍變成新技電鋸。當已習得交換技一，而該種類武器達到生產＋強化累計八次之後（需不同武器，生產同一武器唔計），找教官就會教你交換技 2。然後當集會所升到咁上下就會出現對應交換技 3 嘅任務，完成後即可習得，詳情看下表。