預定喺 2020 年春季見街嘅開放世界喪屍大作《Dying Light 2》，一直以黎可以話係「一波三折」，不但上市時間無限延期，首席寫手 Pawel Selinger 離職以及敘事設計師 Chris Avellone 中止合作風波，心諗有排都無得玩。呢個時候官方終於有新影片發表，最重要嘅係公佈埋上市日期，希望唔好再有咩變數啦。

《Dying Light 2》由 Techland 開發，係一款生存恐怖動作角色扮演遊戲，採用第一身視點，開放世界。遊戲特點在於引人入勝嘅跑酷 + 生存玩法，加上日夜變換系統等元素。今集故事都係講緊主角喺一個喪屍世界入面，為人類最後一座村落、為末日世界作出返分力，以自身傑出戰鬥能力作出改變。

今集劇情仲會加入新元素，類似早前既《Detroit》咁，因應唔同既選項將會改變劇情既走向。根據官方既說明，每一種任務都會有唔同既方式完成。例如某個勢力掌握住寶貴水資源，你可以選擇殺晒佢地強奪；又或者同佢地合作去分享資源。每個選項都會影響後續既劇情，呢個亦都係同上集分別最大既地方。

喺最新影片入面，內容主要都係開發團隊向大家表達「我哋知道你哋等咗好耐，明架啦」訊息，以及喺片尾寫明 2021 字樣，意味住遊戲將於今年內上市，結束大家長時間嘅等候……無意外的話。《Dying Light 2》對應平台為 Xbox Series X|S / PS4 / PS5 / PC Steam。