末日、輻射、廢墟、異變、生存，食《Fallout》奶水大嘅我，每次見到有遊戲集合呢堆元素總係難以抵抗。早排公佈咗一款集合以上元素嘅新遊戲《FIRST》，並且已公開遊戲宣傳影片，睇落感覺非常唔錯！

《FIRST》由 Survgames 開發，係一款生存冒險動作遊戲，採用第三身視點，開放世界。遊戲故事描述大災難後全球人類面臨滅絕危機，玩家以人類唯一希望身份踏上旅途，並與途中救出嘅狗狗（「Dogmeat」??）成為夥伴，共同於受到輻射污染嘅沙漠、廢棄都市、廢墟等地方探索，尋找人類再興嘅可能。

遊戲基本玩法同一般動作遊戲差唔多，暫時已知有近戰類武器小刀、斧頭，遠程武器就有各種槍械，而狗狗夥伴亦會幫手戰鬥以及提早發出危險警告，非戰鬥時亦會幫忙尋找資源（暫時未知係咪要搵糧食、水等生存資源）。遊戲使用開放世界，自然會有大量受感染嘅異變生物，除咗一般怪物之外仲會有超大型異變 Boss，而且根據製作團隊表示，面對敵人並不一定要用「對抗」手段，唔通可以同佢地談判再收佢地做使魔？

《FIRST》暫時仍未有正式發售時間，對應平台為 PC Steam，現時已有相關頁面，有興趣嘅朋友可以先加入 Wishlist。