大熱露營動畫《搖曳露營△》描寫野外活動點點滴滴，每集都令人睇得非常舒服。上星期遊戲化作品《搖曳露營△ VIRTUAL CAMP》終於推出，以對應 VR 為主要賣點，我哋都用咗 PSVR 黎試呢款遊戲，效果竟然比想像中好！

《搖曳露營△ VIRTUAL CAMP》係一款悠閒露營體驗遊戲，今次推出嘅係「本栖湖篇」，玩家將扮演撫子同凜重臨本栖湖營場露營，時間點應該係第一季動畫最尾果段。遊戲基本流程係於野外渡過一日，每段時間都有不同嘅互動選項，大多數都係望下四處嘅風景、飲野、傾計、影相、生火煮食等等。不過由於 VR 所限，一切互動都係用選項完成，無得親身去執柴、搭營，而且最重要嘅煮食部份只係旁白+幾幅圖，極之可惜。

雖然可以「玩」嘅部份接近零，但係呢隻遊戲最大嘅功用係「舒壓」。用 VR 遊玩的話，會有強大嘅臨場感，無限制嘅觀賞角度，無敵富士山景加上極像真嘅波浪聲、樹聲，令玩家非常投入，就算咩都唔做齋坐都覺得舒壓，坐得耐又可以望下凜，沖杯野飲，其他野都乜所謂了。最緊要係其他露營人士紮營地點都相距好一段距離，唔係好似香港營地咁多人過旺角，真正有親親大自然嘅感覺。

遠處微弱燈光就係其他露營人士，相距好一段距離

嘆下野飲，聽下波浪聲真係零舍舒服

遊戲雖然流程極短，但就如上面所講係比你「舒壓」用，所以喺標題已經有得選擇白天、傍晚、夜晚、早晨四個時段，想喺咩時間「Hea」都得。特別一提喺早晨時段完結後就會播片尾曲，最後亦有製作一幅圖提大家去野外露營記得處理營火同垃圾先好走，呢個規則真係放喺邊個地方都啱用，齊齊做個有公德心的好孩子。

記得拎垃圾走阿！

最後附上我枱面嘅撫子

《搖曳露營△ VIRTUAL CAMP》「本栖湖篇」已經推出，「山麓露營場篇」則將於 4 月推出。遊戲對應平台為 PS4 / Nintendo Switch / PC Steam / iOS／Android／itch／Oculus Quest，對應 VR 為 NS Toy-Con 、PS VR、Steam HTC Vive、Oculus Rift 及 Valve Index。手機版本則支援市面上各種手機用 VR 眼鏡，另外不論任何版本唔用 VR 亦可以正常遊玩，不過我地都係推薦大家用 VR 玩，投入感絕對唔係同一個水平。