《異形》呢套作品已經有多款遊戲作品，不過就有一排無推出新作啦。Cold Iron Studios LLC 喺今日就發表異形新作《Aliens: Fireteam》，今次主打多人合作，喺外星迎擊海量嘅異形，睇片就覺得幾唔錯，夏季就有得玩。

《Aliens: Fireteam》係一款科幻動作射擊遊戲，採用第三身視點，支援多人線上合作。遊戲故事發生於 2202 年，身為海軍突擊隊嘅玩家因為收到一個不明嘅求救訊號，於是被派往 LV-895 殖民星球執行任務，呢個星球上有極龐大嘅異形軍團，仲有古老外星人廢墟以及公司機密等緊你。

遊戲中支援三人連線合作，又或者交由 AI 控制隊友。玩家可選擇槍手、爆破者、技術員、醫生、偵察五個職業，分別有各自特殊技能及角色特權。另外遊戲將提供四個戰役關卡、十一種異形、三十多種武器、七十多種改裝配件供玩家選擇，各職業可自由配搭裝備，會為遊戲提供不同體驗。

《Aliens: Fireteam》預計於 2021 年夏季發售，對應平台為 Xbox Series X|S、Xbox One、PS5、PS4 及 PC Steam。