恐怖 Game 大家玩得多，但係叫你扮演可愛嘅貓貓去玩恐怖 Game 又係咩感覺？《Etched Memories》係一款要玩家扮演貓貓嘅恐怖遊戲，用可愛嘅手手進行各種解謎…….等等先，其實咁樣真係會恐怖咩？

《Etched Memories》由二人團隊 From Scratch Studios 製作，係一款恐怖動作冒險遊戲，可自由選擇第一身或第三身視點，採用半開放式世界。遊戲中玩家將扮演一隻叫「餅乾」嘅貓，因為喺某個暴風雨夜晚起身果陣唔見咗媽媽，於是就踏上尋母之旅。旅途中玩家會穿越陰森而廣闊嘅森林，尋找線索以及遭遇各種事件，體驗故事同時解鎖新嘅支線。

遊戲中有好多需要手動解謎嘅地方，有時甚至要用到貓手去拿取物品，喺影片入面就有展示執鎖匙、開箱等動作，用貓手做呢類動作真係別有一番風味。現時遊戲提供試玩版本，不過因為仍處於開發階段所以仲有大量問題需要處理，希望完整版會令玩家有更好嘅體驗。另外根據官方嘅講法，喺完整版本會有大量彩蛋留待玩家發掘，可以喺探索過程中發現佢地。

《Etched Memories》處於開發階段，未有實際推出日期，對應平台為 PC Steam。