牧場經營類遊戲大家都唔會陌生，不過呢類遊戲多數都係單機自己一個默默耕芸。黎緊就有一隻牧場經營遊戲《Ranch Simulator》提供四人同遊，可以同朋友一齊養雞養牛起屋仔，享受下牧場剷屎嘅樂趣。

《Ranch Simulator》由意大利團隊 Toxic Dog 開發，係一款多人線上牧場經營遊戲，最大支援四人同遊，採用第一身視點。遊戲中玩家要接手一座家族牧場，因為係由阿爺果代傳落黎加上坐落於偏僻山谷中，所以經營得並不順利。玩家嘅任務自然就係要幫牧場重建，並且要轉虧為盈。

要重建牧場玩家要去舖頭買工具，然後再買各種相關機械、車輛幫手，翻新主屋並確定要飼養家畜，然後建造倉棚、畜舍及圍欄等等，起好之後仲要定期餵飼供水，保持動物健康成長。動物長大之後就可以幫佢地進行配種，然後幼畜穩定增加動物群數量。當玩家可賣出嘅產品越多，自然得到更多回報去購買更多設備，令牧場進一步擴展。

除咗經營自己嘅牧場，外圍嘅森林山谷都可以探險，亦被設定為開放世界，有大量嘅野生動物。玩家可以同朋友帶備獵搶進行狩獵，不過喺森林入面你亦有機會成為狼群等動物嘅獵物，亦有機會撞見其他打獵嘅人，不過就未知道玩家死亡後會有咩懲罰，等遊戲推出後留待大家發掘。

《Ranch Simulator》預計於 3 月 4 日發售，對應平台為 PC Steam。