喪屍 一向於日本電影中算係少數嘅主題，就算計埋 B 級製作，日本喪屍片都真係少之有少。但偏偏日本就經常出品喪屍題材嘅遊戲，令荷李活喪屍片拍極唔停，甚至拍到爛。

《喪屍末日戰》係由被譽為「十大喪屍漫畫之首」《請叫我英雄》所改篇而成。話就話「最佳」喪屍漫畫啫，一聽到漫畫改篇真係好怕喎，問心近年真係冇乜邊套日漫改篇係睇得過。當然如果你係為左 有村架純 同 長澤正美 而入場的話就另作別論啦。

講返套戲，出色( 15年前 )漫畫家 鈴木英雄 (大泉洋) 喺喪屍病毒爆發期間，隻身帶住一支獵槍及子彈逃生。途中遇上被喪屍BB咬到嘅女高中生 (有村架純) ，亦得知傳聞富士山有方法阻止病毒擴散，二人就結伴前往。

比起好多日漫改篇電影，《喪屍末日戰》叫食得返個主軸，雖然好多內心戲同名場面都冇左。加上如果你睇過《請叫我英雄》，當中「矢島」呢個存在於主角內心所幻想嘅角色，拍出嚟真係會 Gag 到不能…..

導演取捨上做得好出色，一方面減省左漫畫中嘅內心矛盾，令進程上爽快到極。另一方面增加城市中逃難嘅情節，前後景去配合災難逃生，一邊跟隨主角嘅去向，另一方面又做到周邊人同事嘅交代。
最值得一提當然係片中「喪屍」設定，平時所見得最多嘅喪屍都只係發出一啲低嗚聲，呆下呆下四圍慢行。片中同原著一樣，喪屍會保留生前嘅一啲意識，不斷去重複做，例如的士司機會不斷「叫」人戴安全帶、運動員會重複佢地嘅項目動作等等。呢個更加影響主角對喪屍觀感，同時成為內心掙扎嘅一個重要原因。

你係睇開荷里活式喪屍片，你會發現當中有唔少經典情節會喺《喪屍末日戰》當中，但由日本式演繹又係另一種味道。整體上的確可以媲美歐美喪屍大片，更跳出左日式節奏框架，比大家一個新嘅感觀嚮受。