過去兩年對生活喺香港嘅人可謂非常難忘，各種社會事件令我地意識到呢個地方越黎越陌生。雖然當權者用盡方法去歪曲事實，但仍有一班人決心將事實傳承落去。今次我地介紹嘅《曼陀羅的傳承》就係改編自香港示威活動，現時正處於眾籌最後階段，極需大家支持！
《曼陀羅的傳承》（Legacy of Datura）由本地大學生 Mighcty 獨力製作，係一款啟發自香港人嘅 2D 像素風科幻角色扮演遊戲。遊戲主角 Cyrus 本來係一個普通中學生，因為一場意外進入魔界並得到魔法之力。由於魔界係由「議會」所統治，佢地嘅方針就係「禁止使用與生俱內嘅魔法」，所以主角自然成為眼中釘。當 Cyrus 返到現實世界時，就係黨鐵站目擊市民被大量白衣人襲擊，並且無警察到場，面對呢個情況 Cyrus 就使用魔法拯救市民，故事就此展開。
遊戲故事似曾相識，亦隱喻香港人已經失去嘅人權及自由。雖然角色及故事標明係純屬虛構，但部分內容就取材自香港近年嘅社會活動，例如 721 襲擊及「情操高尚」連儂隧道襲擊等等。為咗紀錄真相，遊戲中加入「文件系統」，當玩家特定任務後，系統就會解鎖劇情參考過嘅真實新聞報道，令到玩家明確地了解事件係真實存在。不過始終遊戲係「改編」，根據玩家嘅選擇會出現兩個不同嘅結果，令到結局會有微小嘅差異。
《曼陀羅的傳承》現時正處於開發及眾籌階段，現時係大學四年生嘅作者 Mighcty 打算眾籌成功的話會以 1 – 2 年時間全職開發，希望喺 2023 年見街。遊戲已經有試玩版提供下載，眾籌就去到 15 號夠期，距離目標只係差 22% 就達標（目標 HKD $100,000，目前籌得 HKD $78,000），如果大家都想支持下可以去 Kickstarter 度幫幫手。
不撤不退，我愛香港。