中國近年製作遊戲嘅水平不斷提高，之前有片睇嘅《黑神話：悟空》美術水平絕對唔輸歐美大廠，今日又有一款睇落去美術做得唔錯嘅新作《Project DT》發表，但係就同前者一樣，雖然係新遊戲但就有極濃厚嘅熟悉感，所有野都似曾相識，真係好微妙。
《Project DT》由中國團隊 Digisky 開發，係一款動作角色扮演遊戲。根據官方新聞稿介紹，遊戲以未來科幻世界為背景，因為戰爭地球已接近破壞，人類移居至平流層並居住於由 AI 及機械人管理嘅城市，然後有一日機械人同 AI 失控，於是身穿拳甲嘅女戰士挺身而出。遊戲特色在於戰鬥動作以中國武術表演，招色上借鑑詠春部份招式，並請到《一代宗師》武術指導鍾波為遊戲武術做設計，但就無請到馬保國大師做顧問，話晒現今武林以「閃電五連鞭」最為人所熟悉嘛。
官方介紹就係咁，然後實機演示影片第一個感覺就係「喂咁似 Nier」，再望真啲發現動作連技極似《DMC》，頭目出場仲驚嚇，《MGS》走錯棚？擺明就係再次發揮大國「組裝」嘅精神。再望下句 Slogan「自由的靈魂」，吐糟點真係多到唔知講咩好……。不過當考慮到抄襲大神《原神》都大把人覺得係神作嘅時候，相信呢隻推出果陣又一大班人吹棒，正所謂「只要夠無恥，洗乜有創意」，係咪？
咁熟口面嘅？
連技評分都有好好地組裝落隻 Game 度，唔知後面會唔會有 Dante 參戰？
《Project DT》現時仲係開發階段，未知推出時間及對應平台，如果有興趣嘅朋友自己去 J 啦，我就不了。
VJGamer總編，細細個已經蒲機舖，機齡甚深，熱愛電玩文化。