睇戲成日都有啲痴線佬專係搞人體改造實驗，嘗試將人類同其他物種混合變成其他物種，現實出現呢啲嘢梗係恐怖，但如果將佢變成遊戲題材睇落又幾過癮。日前《Creature Lab》正式發表，遊戲玩法就正正係要玩家扮演呢個痴線佬玩瘋狂實驗做「人體鍊成」！

《Creature Lab》由獨立製作團隊 Image Power 開發，係一款策略模擬遊戲，採用第一身視點。遊戲入面玩家將扮演瘋狂科學家，反覆進行各種化學實驗進行人體改造，藉此創造出究極完美生物。由於呢種實驗係不為社會所容許，自然無法得到政府資金幫助，所以進行實驗所需嘅各種工具、藥物、素材甚至係實驗室都係要自己搞掂，當中自然涉及偷、搶等手法。

當所需物品準備晒之後，玩家要喺實驗室中對藥物混合，然後再分析各種藥物施打於實驗品身體各部位得到嘅反應，以此調整數據再進行下一步實驗。除咗人體內部改造，仲可以製作各種特別嘅「部件」，再安裝喺實驗品身上，例如腳部變成鳥爪、裝上毒囊後可以噴出毒液等等。當玩家擁有第一隻改造生物之後，就可以放佢出去襲擊路人，然後捉佢地返實驗室成為新嘅白老鼠，確保「貨源」充足。

另外玩家所創作嘅改造生物外型越恐怖，對一般市民嘅震懾力就越高，亦即係話自己實驗室地點越難被發現。不過又唔係越恐怖越好，因為搞大件事之後會引來軍方嘅注意，然後就會面臨被剿滅嘅風險。所以玩家要一邊創造生物一邊擬定策略，例如製作感染菌令人般市民受感染，延遲軍方嘅調查等等，策略元素豐富。

《Creature Lab》現時正在開發階段，暫時未有推出日期，有興趣嘅朋友可以喺 PC Steam 度將遊戲加入 Wishlist 先。