網上媒體好多時為咗呃點擊，炒料時唔 Fact Check，或者見到有 Noise 嘅料不論有真偽有抄錯無放過，傳媒道德等如零。早排有本地媒體就話「網傳」Switch Pro 「確實存在」（又傳又確實，用字真精準），講到煞有介事，點知早兩日任記美國總裁接受訪問時正式回應：「無咁嘅事」，正式終止流言。

根據外媒 Polygon 一篇訪問，美國任天堂總裁 Doug Bowser 被問及新世代主機 PlayStation 5、Xbox Series X 擁有強大機能，只有 720P / 1080P 螢幕解析度嘅 Switch 喺硬體上明顯落後，面對呢個情況，傳聞中嘅 Switch 強化版 Switch Pro 係咪真有其事呢？

Doug Bowser 就表示目前 Switch 面世第四年，走勢依然強勁（11 月份 Switch 喺美國嘅銷量超過 135 萬部），喺可預見嘅未來任天堂仍然會專注於 Switch 以及 Switch Lite 兩個平台，並且會研究新技術以改善提及提升玩家遊戲體驗。至於所謂嘅 Switch Pro，Doug Bowser 就明言目前任天堂並無推出 Switch Pro 嘅計畫。

其實睇返過去一年嘅表現，《動物森友會》、《健身環大冒險》、《寶可夢 劍盾》、《薩爾達無雙 災厄啟示錄》、《紙片瑪利歐：摺紙國王》等，無論邊一隻都唔係以畫質取勝，但仍然吸引大量新玩家購買，仲要係每個月都有唔錯嘅銷售數字，任天堂堅持原有方針絕對合情合理。