由 《The MISSING J.J.》製作公司 White Owls Inc. 開發，2018 年於 Kickstarter 眾籌大獲好評嘅債務償還型 RPG 遊戲《The Good Life》，將會喺 2021 年夏季於 PS4、Xbox One、NS 以及 Steam 平台登場。

就咁聽個類型，你可以已經諗到「咪即係《動森》之類儲下道具、同玩家互動下嘅模擬生活 Game」。不過比你估得到佢，呢個班底就唔會出到 《The MISSING J.J.》呢啲咁顛覆嘅 Game 啦！

未講個遊戲點玩，淨睇個故事背景已經夠晒奇幻。喺《The Good Life》入面，玩家係扮演一個嘅靚女記者，而呢個記者就欠落公司一筆債務。結果公司決定派呢個女記者由紐約隻身搬到英國郊外，一個喻為「世界上最幸福的小鎮」Rainy Woods 影相還債，而過程中你唔只發現呢個小鎮嘅秘密之餘，仲要有兇殺案發生，所有事件就靠你去查出真相。

以上都未係最奇幻嘅重點，Rainy Woods 小鎮入面所有人都會喺入夜後變成動物，而玩家同樣可以變成「貓」或「狗」去探查真相，或者爬上高處拍攝一啲正常人影唔到嘅角度。

而且劇情以及 NPC 嘅互動會影響小鎮嘅外觀同建構，喺日後多人模式就可以 Show 比其他玩家朋友睇到你嘅獨特城鎮景物。

影相、查案加《動森》，聽條橋已經夠晒吸引。有興趣嘅朋友自已加定佢落 Wish List 留意住發售日期啦！