德國遊戲工作室 Shin’en Multimedia 香港未必咁多朋友認識，不過佢地旗下一隻歷險解謎遊戲，相信就適合唔少玩家嘅口味。

《The Touryst》於 2019 年 11 月 21 日已經上市，對應平台為 Xbox One／Series X|S、Nintendo Switch（美版）及 PC，同時亦對應 Xbox Game Pass。雖然畫風看似簡單，但係一隻非常精彩有趣嘅小品遊戲黎。

玩家飾演一個旅行家，於島上發現有神秘遺跡，聽講集齊一啲零件，就可以搵出遺跡嘅秘密，你因此而踏上旅途。每個小島都需要解鎖先去到（例如去旅行社買旅遊天書…），然後每個島上面都有獨立遺跡，而遺跡裡面則有設計迴異嘅關卡或者謎題，需要玩家用智力＋靈活動作先能夠解開。

各個小島設計都各具特色

遺跡裡面嘅解謎挑戰難度不一，關卡相當考驗玩家嘅操作技巧，有時亦會限制視點角度、考驗玩家嘅距離感，似乎於舊世代遊戲中吸收咗唔少營養。遊戲一旦「差錯腳」就隨時跌落街，咁就要重新挑戰該關卡了。

各個遺跡裡面嘅關卡都幾有需要操作技巧

故事最後結局，就留待玩家自己探索。不過《The Touryst》除左遺跡之外，每個島都有唔同嘅支線以及收藏品，連沿海嘅位置都可能有隱藏物品比你發掘，仲可能隨時比你搵到地圖上面無顯示嘅神秘島。

支線方面，例如要幫藝術館收集失落卷軸、幫 DJ 搵 CD 返黎做 Clubbing、或者係有個小屁孩挑你機鬥快玩無人機等等，可以話係乜野元素都有，有挑戰性，但又唔會難玩到令人掟手制。

《The Touryst》已經推出，對應平台為 Xbox One／Series X|S、Nintendo Switch（美版）及 PC，同時亦對應 Xbox Game Pass，剛剛入手 Xbox 新主機嘅朋友可以 DL 黎試下！