廿年前 SEGA 曾經推出一隻特別嘅競速遊戲《Crazy Taxi》，因為遊戲極度過癮，瞬間就瘋魔萬千機迷。雖然遊戲取得大成功，但系列已經多年無新動作，又因為玩法獨特，市場並無其他遊戲能代替。不過日前 Lion Castle Entertainment 就正式公佈佢地正開發一款競速遊戲《Taxi Chaos》，內容大致就係新版《Crazy Taxi》，令人非常期待！

《Taxi Chaos》同《Crazy Taxi》一樣，都係扮演一位的士司機，喺限時之內不停接載城中嘅各種乘客，再送佢地去目的地賺取金錢同額外時間。遊戲有趣嘅地方係你可以用「任何方式」到達目的地，你鍾意喺橋跳落黎又得、剷過公園飛幾條街都得。另外城市入面滿佈大小不一嘅捷徑，發掘最速捷徑同樣係趣味所在。

原版《Crazy Taxi》有個「Chok」嘅動作，成功的話的司會快速衝前，未知呢個系統會否出現於《Taxi Chaos》。現時遊戲資訊不多，已知會有開篷式的士、豪華型超級跑車、肌肉車、老爺車及日本製漂車，總數有七款車選擇。另外《Taxi Chaos》已經放咗遊戲光碟封面出黎，成個設計擺明向《Crazy Taxi》致敬，希望出黎品質有返咁上下啦。

封面比較

《Taxi Chaos》預計於 2021 年第一季推出，對應平台為 PS4 / Xbox One / Nintendo Switch。