今次又係介紹解謎小品遊戲，由台灣 HuMoFish 獨立開發嘅《地城謎蹤》（Dungeon and Puzzles）玩法簡單易上手，但係難度絕對唔低。遊戲雖然要下年先推出，不過早排推出咗試玩版，自問有返咁上下腦筋嘅唔好錯過。

《地城謎蹤》（Dungeon and Puzzles）係一款集合地城解謎倉庫番於一身嘅遊戲，採用像素風格。遊戲玩法簡單，玩家擊敗房間中所有怪物後，往下一層嘅大門將會打開，不停向下進發就係遊戲目標。喺每關開始時，玩家需拿取武器後先可以擊敗魔物，用劍就要近身劈、弓可以遠距離射。但玩家無法自由控制移動距離，移動時會喺遇到牆壁、怪物、凳等障礙物前不會停低，行每步都要經過計算，務求係標準步數內過關。

遊戲提供 150 關，每關都係精心設計，玩家要充分了解遊戲機制以及道具功效先玩得掂。喺試玩版提供嘅關卡難度唔低，我地都只係 Keep 到標準步數過關，根據官方所講有可能用更少步數過關，呢啲咁辛苦嘅嘢都係留返俾啲神人試。

《地城謎蹤》（Dungeon and Puzzles）預計 2021 年第一季推出，對應平台為 PC Steam，支援繁體中文。