《雷頓教授》之類嘅解謎遊戲相信大家玩得唔少，但係大多數解謎遊戲都係要你喺遊戲內搵出線索再解答，好少會突破呢個框框。早前無意中發現一隻手機解謎遊戲《Find Out》，有極多數嘅謎題都係要你用三次元方式又或者思維去解開，非常有趣。
《Find Out》喺今年年頭推出，係一款免費嘅解謎遊戲，總共有解謎、博物館、找尋物件模式、瘋狂找找找四個模式，瘋狂找找找係要你喺一大堆野中間搵出任務需要物品，找尋物件模式就類似《Photo Hunt》咁找錯處，博物館就係幫你賺錢嘅模式，至於解謎就係最重點嘅模式。
其他模式都豐富多野玩
解謎模式簡單講就係透過同手機互動，搵出下方列出嘅任務物品。喺每個版圖入面，大致上分為可動、不可動、有互動關係嘅物件。可動物件可能係一隻叉、一朵花，將呢個可動物件交俾關卡中嘅人、動物就有機會產生變化，例如想拎狗仔口中咬住個波，就要比舊骨頭佢咁。不過遊戲有趣嘅地方在於思考圖中物件嘅關係，例如前期關卡為咗得到豬仔戴住頂睡帽，所以要整醒熟睡中嘅佢，用嘅方法就係撳實佢個鼻等佢抖唔到氣紮醒，又例如有關任務物品係烏蠅，要達成條件方法係令到畫中人物屙屎，因為臭味而引烏蠅入屋，整個遊戲充滿住大量呢類互動關係謎題。
要思考畫中物件互動關係
除咗上述玩法，好多時仲會利用三次元方式解謎。例如喺垃圾桶入面嘅物品，你要掉轉部手機「Chok」佢出黎、要傾斜手機令梳化後嘅球碌出黎，最印象深刻係有一關畫中人物手機無電，要令開著部機嘅方法就係你幫自己部電話充電，勁考腦筋。
叉電呢下真係諗咗好耐
有興趣試下呢隻《Find Out》嘅朋友可以自己去 App Store 或 Google Play 下載，免費又有繁中，值得一玩。
動漫電玩宅，極愛金田一系列，擅長動作及策略遊戲