夜欄人靜想自己一個人玩啲靜態啲嘅遊戲？今次介紹呢隻《Night Call》或者會適合你。法國獨立工作室 Monkey Moon 於 2019 年 7 月 17 日時就面推出左懸疑文字歷險遊戲《Night Call》，對應 Steam、Xbox One、PS4（歐美）及 Switch（歐美）；遊戲於 Steam 平台上獲得好評，現在亦為 Xbox Game Pass 裡面可遊玩嘅作品之一。

玩家於《Night Call》裡面飾演夜更的士司機，每晚都於巴黎上接載各種類型嘅客人。遊戲分為幾個章節，每個章節難度都會遞增，但都與巴黎發生嘅罪惡有關。法國警察捉住你從前犯過罪嘅把柄，逼你要幫佢地搵兇手，於是你就要於接載客人之時，用辨法逼佢地提供有關罪案嘅資訊或線索。

遊戲有一定時間規限，每晚玩家都有體力限制，而每一程車都會消耗車油，而去入油會降低你嘅收入；所以，要接邊個客，同時要維持自己收支平衡，仲要喺可疑嘅客人身上「收風」，幾個元素加埋，都會係玩家遇到嘅挑戰。

講緊英國脫歐

《Night Call》係一隻文本遊戲，因為主打歐美向嘅關係，對於亞洲玩家黎講，另一樣挑戰係佢嘅文字，例如部份單詞會執意用返法文（例如「raison d’etre」）；有時接載到遊客（例如日本人），嗰一程車佢就會講日文，理論上變成同司機雞同鴨講（但對於我地黎講，日文不知幾親切）。呢種文字語言上嘅反差感，都係遊戲樂趣之一。

雖然《Night Call》被歸類為「黑色幽默」遊戲，但係玩落，你只會發現到淡淡嘅無力感。客人無論富或貴，每人都於自己生活中面對各種痛苦與不快，而作為「流動樹窿」嘅玩家，日復一日接收各種負能量之後，都會開始思考自己嘅存在意義，到底要繼續咁樣嘅人生，抑或一死了之，都有可能成為玩家於遊戲類面嘅選項。

遊戲全體以黑白色彩造成，於背景音效上面亦落足心機營造氣氛。由於大部份劇情都發生於車廂之中，以客人嘅對話來揭示社會上面各種狀況，概念與美國當代小說《Cosmopolis》有幾分相似。假如你係喜歡文學作品嘅朋友，《Night Call》或者會啱你口味！以下為 Steam 網址傳送：

雖然係帶著灰暗色彩嘅遊戲，不過作為獨立製作黎講，都係一隻相當有特色嘅作品。《Night Call》暫未對應中文版本。