未推出時已經有《薩爾達傳說》抄襲者之名，由大陸廠商米哈游開發嘅「原創」 Game《原神》，甫推出就被發現有後門程式，輕則收集用戶硬體資訊及使用習慣，嚴重者甚至可以控制玩家裝置，成為官方嘅僵屍電腦，雖然後來米哈遊話係防外掛系統，但大陸廠嘅承諾……你懂的。本來以為呢個問題只會出現喺 PC 或者手機版上，不過日前就有日本玩家「瀨野」，喺遊玩 PS4 版本《原神》時直接被人 Hack 埋。

雖然《原神》被爆出設有後門程式，後續更被玩家發現如果照官方建議綁定自己 Twitter 帳號的話，米哈游將會得到修改帳號基本資料、用你帳號檢舉他人、封鎖他人帳號、以追蹤或解除追蹤其他帳號等行動，基本上係接近全權控制你 AC，而且喺《原神》相關說明並無顯示需要玩家咁高權限嘅授權。雖然之後哈游宣佈取消呢個「防外掛系統」，但仍未能令玩家重拾信心，而且早前更有日本玩家遊玩 PS4 版《原神》時出事。

「防外掛系統」已全面取消

出事嘅日本玩家 すずにー（@SZN_aniki），喺早前遊玩《原神》中帳戶被其他人登入，而且將佢嘅 ID 同 PW 都更改埋，佢本人亦都貼出多張截圖證明，亦已經聯絡 PlayStation 尋求協助。之後網上有人質疑係咪事主自導自演想炒熱話題，但事主 PSN 帳戶 2018 年已經使用，ID「YABAIWAYO_」亦有購入多款遊戲，可以證明係主要帳戶。雖然未知事件起因，估計係 Twitter 同 PSN 使用相同登入密碼，並且綁定 Twitter 帳號給予米哈游授權，當然以上純屬猜測，但有玩《原神》嘅朋友務必小心，特別係 PSN 有綁定信用卡嘅玩家。

//twitter.com/SZN_aniki/status/1311284377284820993

事件目前未知後續如何，但《原神》已經用實力證明佢地係真正意義上嘅「開放世界」，即係整個世界都為佢開放咁解，中國再次領先全球，Yeah！