《牧場物語》、《星露谷物語》呢類農場經營遊戲大家都唔會陌生，呢類遊戲多數都係要玩家專注於種菜、養動物、經營農場，好少會同個「死」字拉上關係。今次介紹嘅農場經營遊戲《Scrapnaut》就有啲唔同，佢將農場種菜加入尋寶、求生要素，係一隻真係會玩到「死」嘅農場經營遊戲。

《Scrapnaut》由 SpiffyBit 開發，係一款農場經營生存冒險遊戲， 採用俯瞰視點、Steampunk 風格。故事講述玩家因不明事故，飛船被逼降落於一個充滿障氣嘅地方。玩家喺呢個地方四處探索找尋修理資源時，遇到一部破損嘅機械人，喺佢口中得知你係近二百年黎第一位黎到呢個地方嘅人類。為咗維修飛船並生存落去，主角就決定就地興建農場提供自己生活所需。

由於呢個地方充滿障氣，所以初頭喺飛船離開探索時係會扣減氧氣存量。不過當玩家發現並開啟氧氣製造機後，一定範圍內活動就唔再需要扣氣。解決呼吸問題後，自然要解決三餐所需。前期會喺就近地方執到罐頭，但長遠黎講都係要有完整食物供應鏈，所以大家就要係附近收集木材、石頭等資源興建帳蓬、水井、田地，食物收成後再烹煮補充飽食度。（飽食度扣得頗快）

野外有 Boss 的

遊戲目的係要逃離呢個地方，所以有野食有地方瞓只係基本野。玩家需要外出探索尋找修復飛船嘅資源，同時要收集素材製作防禦工事抵擋來襲敵人。又因為大部份稀有資源都係處於地下礦坑，下面有各種機械人同怪物等緊你，所以玩家要準備移動用交通工具、武器等等。要注意落礦坑係會扣氧氣值的，所以備用氧氣瓶同樣要預早準備。

要入地下礦坑採集資源

《Scrapnaut》尚在開發中，未知發售時間。不過現時喺 Steam 上已經有序章供玩家免費下載，而呢個序章可供探索嘅地方可以話係非常之大，有興趣朋友可以一試。