工作室 Trigger Labs 即將推出全新生存策略遊戲《Pandemic Train》，對應平台為 Steam，預計 2021 年 11 月 26 日正式上架。

於《Pandemic Train》劇本中，致命疫症正於世界漫延，玩家所控制嘅火車係人類最後嘅希望。玩家嘅最終目標，就係要喺車上面開發出對抗疫症嘅疫苗，但係遊戲富有多元互動元素，亦會出現多變嘅緊急狀況，所以要完成開發任務絕對唔容易。

玩家除左控制車上糧食生產系統，亦要控制負責開發疫苗嘅專業人士。由於全世界得返你架車可以生存，所以不時會有人要求上車。但係，到底你要救幾多人、救邊啲人、以及列車燃料或糧食唔夠時，你又會選擇趕邊啲人落車？呢啲人口管理，都係遊戲當中嘅難題之一。

遊戲中仲有少量動作元素，因為呢架「挪亞方舟」一樣嘅火車，絕對係所有人眼中嘅「肥豬肉」，所以不斷會有人嘗試武裝挑機或者騎劫你架車，到底要點樣見招拆招，呢樣就留比玩家到時細味了。

《Pandemic Train》除左有管理經營要素，遊戲當中仲有唔少挑戰玩家道德倫理觀細節，整體感覺與 Netflix 改篇自同名電影嘅劇集《Snowpiercer（末日列車）》非常相似。假如你對呢種題材嘅遊戲有興趣，《Pandemic Train》預計 2021 年 11 月 26 日正式於 Steam 上架。