大家好，又係我Snakie何師傅。

對上一次投稿已經係6月既事，皆因POE開季師傅都埋頭苦幹POE既新League所以都未有投稿，不便之處，唔好意思！今次同大家介紹既係暫時直播係Twitch Top 5既《Fall Guys: Ultimate Knockout》60人跑Online食雞遊戲，娛樂性同挑戰性絕對係有目共睹，希望下面哩條影片可以令大家對遊戲有深一步既了解，當笑片Cut Scene睇都唔錯架！

師傅最後玩到32 Lv先食到第一隻雞，不停同第一位刷身而過，個感覺真係好弱智。
可惜缺點方面，小遊戲不足以及耐玩度方面如果可以再多ｄ更新甚至係如果比玩家設計關卡既話相信遊戲樂趣會大增（當然純粹幻想），只可以密切期待佢地8月28號既Season 2 公佈更新喇。

影片以外評論 – Fall Guys 證明創意好緊要

大逃殺類遊戲或模式（食雞，下同）早在2012年既時侯已經有係《DayZ》上面有推出過，當時既推出食雞遊戲都不及一隻《PUBG》帶黎既潮流，《PUBG》潮流直頭將個玩法既名稱由大逃殺變成食雞，雖然師傅本人對食雞遊戲係無嘜好感（其實我對大部份PVP遊戲都沒嘜好感，因為廢），無可否認哩個模式／玩法既魔力的確係好利害，癲覆左好多傳統既PVP玩法，遊戲廠商們都紛紛加入分一杯羹。

除左《PUBG》因為朋輩壓力買左黎玩之外其他食雞遊戲師傅都無玩過，真係無嘜興趣。

當遊戲廠商們紛紛效法食雞風氣既時侯，玩家同時係哩一波潮流入面慢慢意識到食雞遊戲既缺點：

• 上手難度高，新手玩哩一類遊戲好容易落地就變盒，路都未識行點去學玩隻Game？
• 運氣成份，好多非人為因素影響，導致每一場既結果除左玩家技術之外，運氣都有一定既影響力，裝備既拾取，收圈既方向各樣等等，技術再好但真係執唔到子彈都只係一個廚師；
• 投放回報不對稱，因為只有1個嬴家，就算你投放好多時間玩，可能玩左二十分鐘都未見到人然後比人一鎗殺左；同時都可能就咁坐係個圈度等人打生打死就嬴左，遊戲體驗落差太大。

外掛就已經唔需要多講，因為任何遊戲有外掛都係好影響遊戲體驗（雖然《PUBG》真係死係外掛手上），所以唔放佢入食雞遊戲既缺點。

開頭我諗唔明點解Fall Guys都要有外掛？後來我諗到，除左玩弄其他玩家之外，最重要係儲冠賣Acc，大陸最興架啦。

正當食雞Market得返《Fortnite》可以企得穩既時侯，《Fall Guys: Ultimate Knockout》既推出又再一次將其他食雞遊戲既通病一一推翻，上手門檻低，遊戲易學難精，跑Online唔會有難度；運氣成份盡量減少，就算有hacker都可以有機會用團隊遊戲將佢消滅，可見運氣成份比重低好多；個人認為最利害既地方係罷脫左大部份廠商都係沿用FPS藍本黎造食雞遊戲，Apex，COD Black Ops等等都係由《PUBG》既方向上面衍生出其他玩法；反觀而家淨係用粒豆就已經打上8月新遊戲榜首，所以創意永遠都係排第一，而且官方Twitter既玩家既互動以及同其他廠方既合作各樣。

Fall Guys既官方Twitter既互動除左快之外仲要係好有趣，連蛇叔都可以引到出黎！

所以《Fall Guys: Ultimate Knockout》既成功，除左本身遊戲創意上既突破之外，PR工夫絕對係做得非常得體漂亮，所以真係抵粒豆咁沙塵既。
如果想繼續看到遊戲攻略評價，各式各樣遊戲影片，請訂閱小弟Snakie何師傅的YouTube頻道！多謝收睇，謝謝你，再見諸位！

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。