由英國著名作家 George Orwell 喺 1945 年出版嘅《Animal Farm (動物農莊)》，內容雖然係諷刺蘇聯嘅獨裁統治，但係好多媒體都拎返呢本經典諷刺小說嚟比喻現世，不過大家又有冇睇過呢本咁經典嘅作品？

啱啱好喺今年 8 月就係《Animal Farm》出版 75 週年紀念，英國獨立遊戲製作公司 Nerial，繼大受好評嘅卡牌式經營遊戲《Reigns (王權)》後再創新猶，將《Animal Farm》呢本小說改編成遊戲版《Orwell’s Animal Farm (奥威爾的動物農莊)》，並於今年秋季於 PC 及手機平台發售。

《Animal Farm》小說係講述荒廢農務、不負責任嘅農莊主人因經營不善，動物推翻人類統治，將農莊管治權交由動物自治並宣稱「所有動物一律平等」。當”豬”得到到權力後，要求其他動物認同”豬”係特權階級，並將之前定落嘅「平等宣言」改為「所有動物一律平等，但一些動物比其他動物更加平等。」，最終成為另一個極權統治者。

而《Orwell’s Animal Farm》就係以小說內容做藍本嘅一款敘事式遊戲，遊戲中你可以決定農莊內所有人同動物嘅命運，從而達到”最平等”嘅生態。不過遊戲嘅完整遊玩方式暫時都未有確定，不過講到明今年秋季會推出，相關嘅遊戲資訊都會短期內公佈，希望大家耐心期待。

叫大家乖乖地睇本英文小說應該難過登天，依家有遊戲版本，咁就啱晒想知《Animal Farm》原本故事又懶去睇書嘅朋友使用。