《Pokemon》家傳戶曉，寵物造型可愛，玩法又簡單易入手，但同時又有天梯供進階玩家挑戰，可以話同時照顧晒優閒玩家同認真型玩家。不過咁耐以黎，只有《Pokémon: Let’s Go, Pikachu!》可以進行雙人連線，無得多人同遊一齊冒險。《Temtem》就針對呢點開發，可以將之視為「多人連線版 Pokemon」。

《Temtem》由西班牙遊戲團隊 Crema 開發，係一款大型多人連線 MMORPG，採用回合制戰術。遊戲喺 2018 年時於 Kickstarter 上集資，最終以目標 8倍以上嘅金額 $57.3 萬美元達標。遊戲本身參考咗大量《Pokemon》元素，不但風格相似，連著名劇情「三揀一」、草叢遇上小精靈、宿敵、道館等等亦都一應俱全。喺戰鬥設定上，小精靈同樣有屬性相剋、只能攜帶四招、馴服、培育等設定。

遊戲同《Pokemon》係極之相似，相似嘅程度曾被人批評為「抄襲」，但 Steam 版自年頭推出搶先體驗後，獲得「極度好評」評價，正評數亦都多到嚇死人。加上銷售數字驚人，根據 Steam Spy 資料顯示，遊戲推出一個月時已經有接近 100 萬銷量，完全無受到「抄襲」嘅影響，咁到底係咩原因令佢成功？

多達 2萬篇正評評論

《Temtem》成功最主要係佢以「多人連線」為主要賣點，佢將《Pokemon》概念加入 MMORPG 元素，將之變成一種新嘅體驗。雖然《Pokemon》都有連線對戰元素，但整體遊戲框架都係以單機為主，就算係《Pokémon: Let’s Go, Pikachu!》都唔例外。踏入《Temtem》嘅世界，玩家離開新手村後，已經會見到大量玩家走黎走去，可以直接同佢地交易、對戰、組隊冒險，而呢樣野正正就係玩家所渴求嘅元素。

另外，《Temtem》嘅對戰係以小精靈 2 vs 2 為主，並且有「耐力值」限制技能使用次數上限，而且高階技能需要一定回合數後先用得，組隊及策略更考腦筋。有咁嘅設定相信係同樣參考咗《Pokemon》嘅做法，會定期舉行各種比賽，加長遊戲生命週期。

老實講，《Temtem》的確係一款出色嘅作品，雖然現時只有 PC Steam 版本，但官方已公佈將會推出 PS5 及 Xbox Series X 版本，並於 2021 年上市，NS 版就預計 2021 年春季，想玩主機版嘅留意啦。