不論係咩界別，抄襲別人作品通常都會比人唾棄，但如果將「抄」呢樣野玩到極致你又點睇？痴線日本獨立遊戲團隊 POCKET PAIR 就整咗隻遊戲《Craftopia》，將數之不盡嘅名作元素全部都抄落去，睇完條預告真係唔識點吐糟好，最可怕嘅係，睇完之後我想玩……

《Craftopia》係一隻角色扮演動作遊戲，採用第三身視點，開放世界。喺預告片入面，可以見到《薩爾達傳說曠野之息》、《Monster Hunter》、《Minecraft》、《No Man Sky》、《Dirt》、《牧場物語》、《Pokemon》、《Fortnite》等等大作嘅影子（相信正式版會見到更多其他 Game 元素），而製作團隊亦都講到明係想將一堆大作溝埋一齊，睇下會點。估唔到睇落又幾正，起碼我係極有興趣先。

真係似到呢……

根據官方早期嘅介紹，遊戲入面會經歷三個時代，分別係「Primitive Era」（遠古時代）、「Dragonic Era」（恐龍時代）以及「Celestial Era」（天體時代），淨係睇到呢度都覺得有《AOE》味，不過暫時就未知三個時代會有咩分別。

遊戲內含元素可以話係痴線地多，最基本有「種植」系統，玩家可以落田種植各種農作物，收成之後就可以拎去賣，然後就有錢去 Upgrade 農場，現時已知道有超過二十種農作物。另外如果玩家覺得收菜收到悶，可以買全自動機器人幫你打理農場。

採集完石頭、木頭呢類道具之後可以合成，遊戲入面有多達 3,000 幾種物品供合成，真係玩到手軟。於是我地就可以建造類似《Minecraft》入面嘅自動化機器，去幫我地合成製作物品，真係睇見都過癮！

喺遊戲世界入面，玩家會見到各種奇珍異獸，覺得好可愛嘅話不妨捉隻返去養。遊戲入面有「精靈球」呢味野存在，見到心儀動物就捉啦，ポケモンゲットだぜー！

戰鬥部份我真係唔識講，有時似《薩爾達傳說》、有時似無雙、有時似《Monster Hunter》，我都睇到好迷，但角色升級後都可以點技能樹，有體術有魔法咁。另外遊戲入面可供探索嘅地方就非常之多，島嶼、深山、沼澤、洞穴、空島、地下城等地方都有，而喺呢啲地方最深處等緊你嘅當然有 Boss 同寶藏啦。

開放世界地大物博，靠行路嘅話真係行到 2046，所以有載具係必然。然後你睇隻 Game 係行《薩爾達傳說曠野之息》風格，以為一定係騎馬之類，咁諗你就錯了。普通如平衡板、熱氣球，去到電單車、直昇機，再去到坦克、機械人都有，估你唔到。

《Craftopia》遊戲元素真係多到講唔晒，總之就係好豐富啦。遊戲預計於 9 月 4 日進行 Early Access，有興趣嘅朋友留意啦，支援線上多人遊玩，對應平台為 PC Steam。