近年 Roguelike 類型遊戲盛行，但係傳統洛克人式橫向動作遊戲仍不乏捧場客，今次介紹嘅遊戲就屬於呢個類型。由獨立開發團隊 Homunculus Games 製作嘅《Endless Memories》，著重於操控技巧以及觀察敵方攻擊再思考對應策略，鍾意玩動作遊戲嘅朋友值得留意。

《Endless Memories》官方就話係類惡魔城遊戲，不過感覺上更接近洛克人。遊戲基本動作有跳躍、近戰攻擊、遠程攻擊、衝刺、使用魔法等。動作雖少但係變化頗大，因為本作重點係「組合」。透過組合魔法、遠程攻擊同近戰攻擊，會產生各種變化。例如遠程攻擊+冰魔法可以射出冷凍魔法，凍結敵人後再衝埋去斬。混合各種武器將會有唔同作戰風格，自由度極高。

冰魔法組合

各種武器+魔法組合

除咗武器組合之外，仲有類似 RPG 遊戲嘅符文組合系統。組合各種符文後將會強化魔法技能，簡單如增加魔法使用次數；可使用魔法盾牌等等。透過了解各類型嘅武器及符文，喺打王時思考對應策略正正係本作好玩之處，加上動作流暢度頗高，甚有洛克人味。（官方講到明有超過 250 種敵人及 30 隻以上 Boss）

符文組合系統

Boss 戰，好似打緊 Airman 咁

《Endless Memories》今年內會推出，對應平台為 Nintendo Swich 及 PC Steam。