因為美術風格加上號稱高難度，類魂遊戲《Mortal Shell》喺公佈初期已經備受注目，加上日前外媒 IGN 放咗條 16 分鐘實機遊玩片段出黎，令一眾無得玩嘅玩家心癢難耐。好在官方知道大家對遊戲非常期待，即日起就開放公開測試，仲揀咗非常「特別」又得廣大玩家喜愛嘅 Epic Games Store 黎做限時獨佔平台，真係開心到喊。

《Mortal Shell》由多名資深遊戲開發者組成嘅獨立團隊 Cold Symmetry 製作，屬動作冒險遊戲，採用第三身視點。遊戲背景設定於人類快將滅亡嘅末日世界，而主角為咗前往擊敗「Dark Father」展開旅程，並且同眾神嘅信徒們展開戰鬥。另外角色設定亦都非常有趣，玩家擁有一種特殊能力，可以附身於各種死去嘅戰士遺骸「Mortal Shell」，並且控制佢地嘅身體戰鬥，當然使用嘅技能及武器都會有所分別。

喺今次嘅公測，官方將會開放「Harros」及「Tiel」兩名「Mortal Shell」戰士供玩家使用，而且官方亦都講明難度頗高，亦都滿佈《Dark Souls》系列式嘅惡意滿滿內容，就算高手都要大約一小時先玩得晒公測內容。另外為咗保護劇情，測試版本唔會有任何對白及劇情演出，地圖大部份地區亦會鎖上，希望大家將精力留在熟悉遊戲戰鬥系統及玩法。有興趣嘅玩家可以睇咗實機遊玩片先，再決定玩公測定等多陣玩正式版。

《Mortal Shell》預計於 2020 年第三季推出，對應平台為 PS4 / Xbox One / PC（Epic Games Store 限時獨佔），PC Steam 版本就要等到 2021 年推出。