黑曜石娛樂（Obsidian Entertainment）喺遊戲界不嬲都係信心保證，佢地黎緊最新嘅作品《Grounded》同樣極具吸引力。喺新作入面，玩家將扮演被縮小到螞蟻 Size 嘅「蟻人」（不具備變大變小功能），然後喺危機四伏嘅後院搵方法生存落去，同時又要諗下點變返大，一班朋友玩應該會幾歡樂。

《Grounded》係一隻動作生存冒險遊戲，採用第一身視點，支援最大四人連線遊玩。遊戲中玩家因不明原因被縮小到只有螞蟻咁大，又因為身處嘅地方係後院，滿佈蟻、甲蟲、小強、蜘蛛等各種生物，首要任務自然係點生存落去，次要任務就梗係搵方法變返大。

《Grounded》現時喺 PC（Steam）同 Xbox One（Xbox Insider）限時開放試玩版，而試玩版只開放單人模式及只可以玩半小時（等於遊戲入面一日）。但係半小時完結後仍然可以重新開始，探索其他地區或者試新野，此版本有四位角色選擇，出生點固定。

作為一隻動作生存冒險遊戲，製作工具就一定有，不過本作有趣嘅地方在於有得起埋基地，滿足晒我地細個果陣想起城堡嘅願望。透過興建基地去設立防禦據點，喺呢度你可以製作工作台整武器、防具、工具等等。另外搜集素材返據點後，分析過後又會學識該素材用途，藉此豐富及強化自己所擁有嘅各種道具。

《Grounded》預計於 7 月 29 日正式上市，對應平台為 Xbox One  / PC（Steam），並且包括在 Xbox Game Pass 內（第一個月只需 HKD$10 月費 ）。至於試玩版已經開始，到 6 月 22 號停止。