自從《Bloodborne》成功後，每隔一排就會出現一隻用「克蘇魯神話」設定嘅遊戲，不過十居其九都係伏。日前瑞典獨立工作室 Carry Castle 就正式公佈佢地黎緊嘅作品《Source of Madness》，同樣地使用「克蘇魯神話」設定，但係就玩平面動作，初步睇感覺唔錯，有潛力。

《Source of Madness》故事設定於十八世紀嘅歐洲，不過就處於一個叫做「Loam」嘅世界，呢個世界受到宇宙實體控制（即係果堆「神」），同時不斷重複扭曲及變形，處於極不穩定狀態。倖存人類躲避於「知識之塔」中。然後，主角就喺呢班人中出現，賞試打破困局。

遊戲美術非常出色

遊戲入面有九個唔同嘅世界供探索，「克蘇魯神話」所描述嘅怪物都會出現。由於故事設定呢個世界係不停變形，所以每次當你進入遊戲時，地圖結構、生物等等都會發生變化。不得不提嘅係本作係敵人設定下咗唔少工夫，遊戲中嘅敵人係使用神經網絡，當中會有一隻擁有強大 AI 嘅怪物獨立行動，並且不時學習並改進戰鬥技巧，應該頗有挑戰性。

戰鬥系統方面，基本上係使用各種魔法進行，透過技能樹玩家可以選擇唔同風格戰鬥模式。雖然講就話係魔法攻擊為主，但並唔係果種離遠射射射嘅無腦打法。專精遠距離嘅當然有，亦可以爬上怪物身體上進行近距離戰鬥。根據官方所描述，大部份巨型怪物都可以爬上去打，成件事睇落好玩咗。

《Source of Madness》預計於 2021 年正式上市，對應平台為 Nintendo Switch / PC（Steam）。