一講到玩校園、高自由度等元素，自然就會諗起 Rockstar 嘅《Bully》，但係佢又遲遲唔出新作，想喺校園搞事都無著落。曾推出多款惡搞遊戲嘅 Forceight，今日正式推出一隻主打校園師生大亂鬥嘅遊戲《Bad Guys at School》，而且誠意十足，玩得嘅元素真係多到嘔，極度推薦。

讀書時期，除咗讀書之外最重要嘅梗係每日返學可以點「玩 」（當然玩嘅定義就好闊嘅……）。遊戲中扮演學生嘅一方，最普通嘅掉紙飛機入教員室、同其他學生打交呢啲咁普通嘅野當然有，進一步用滅火筒周圍噴、用玩具弓箭射老師。但係作為一隻痴線 Game，又點會咁小兒科，可以騎馬再用繩索套住老師拖行、去 Lab 度飲化學藥劑變身做 Hulk、捉條野生鯊魚掉落學校泳池等等，真係多野玩到爆。

《Bad Guys at School》除咗扮演學生之外，仲可以扮演老師一方。做老師嘅，當然就係負責阻止學生喺學校搞事。不論扮演任何一方，可以做嘅野都相同。我地估計有呢個設定，係因為製作團隊想提醒大家，「鞭策」學生喺教育上面係幾咁重要……。

水淹學校！

搞人打波結果比人圍……

玩法過癮，提供嘅道具同樣有趣。一般常見物品例如球棒類、炸藥、空氣炮；載具如消防車、磁力車、壓路車、火箭等等，任君選擇。順帶一提，遊戲中大部份攻擊都係無視物力現象，即係比人打一下會飛到隔離街，睇都覺得正！

唔想打打殺殺，探索下社區都幾唔錯

《Bad Guys at School》於今天（6 月 16 日）正式上市，對應平台為 PC Steam，支援多人線上同時遊玩。